Santali Story- Jososiya hag nyay || ᱥᱟᱱᱛᱟᱲᱤ ᱠᱟᱹᱦᱟᱹᱱᱤᱼ ᱡᱚᱥᱚᱥᱤᱭᱟᱹ ᱦᱟᱜ ᱱᱭᱟᱭ

     

                    

      ᱢᱤᱫ ᱫᱤᱱ ᱢᱚᱦᱟᱨᱟᱡ ᱡᱚᱥᱚᱥᱤ ᱨᱟᱡ ᱠᱟᱹᱢᱤ ᱥᱟᱭ ᱠᱟᱛᱮ ᱫᱟᱠᱟᱭ ᱡᱚᱢᱟ ᱢᱮᱱᱛᱮ ᱢᱤᱫᱴᱟᱝ ᱵᱟᱵᱽᱬᱮ ᱧᱟᱯᱟᱢ ᱞᱟᱹᱜᱤᱫ ᱮ ᱥᱮᱴᱮᱨ ᱮᱱᱟ ᱾ 

    "ᱧᱟᱯᱟᱢ ᱵᱟᱭ ᱦᱩᱭ ᱫᱟᱲᱮᱭᱟᱫᱼᱟ, ᱜᱟᱯᱟ ᱦᱤᱡᱩᱜ ᱢᱮ" ᱾ ᱫᱟᱨᱣᱟᱱ ᱮ ᱢᱮᱱ ᱠᱮᱜᱼᱟ ᱾ 

      ᱱᱚᱣᱟ ᱠᱟᱛᱷᱟ ᱨᱟᱡᱟ ᱟᱝᱡᱚᱢ ᱠᱟᱛᱮ ᱵᱟᱵᱽᱬᱮᱭ ᱦᱚᱼᱦᱚ ᱟᱫᱮᱭᱟ ᱟᱨ ᱦᱤᱡᱩᱜ ᱨᱮᱱᱟᱜ ᱮ ᱠᱩᱞᱤ ᱠᱮᱫᱮᱭᱟ ᱾ ᱵᱟᱵᱽᱬᱮ ᱟᱹᱲᱤᱥᱛᱮ ᱢᱮᱱ ᱠᱮᱜᱼᱟᱭ, "ᱢᱚᱦᱟᱨᱟᱡᱽ ! ᱟᱹᱰᱤᱜᱟᱱ ᱫᱤᱥᱚᱢ ᱫᱟᱬᱟ ᱠᱟᱛᱮ ᱢᱤᱫ ᱥᱟᱭ ᱥᱚᱱᱟ ᱴᱟᱠᱟᱹᱧ ᱡᱟᱣᱨᱟ ᱞᱣᱜᱼᱟ ᱾ ᱫᱤᱥᱚᱢ ᱨᱮᱱᱟᱜ ᱦᱟᱞᱚᱛᱷ ᱥᱩᱫᱷᱟᱹᱨ ᱮᱱᱟ ᱟᱸᱡᱚᱢ ᱠᱟᱛᱮ ᱫᱤᱥᱚᱢ ᱛᱤᱧ ᱨᱩᱣᱟᱹᱲ ᱦᱮᱡ ᱮᱱᱟ ᱾ ᱦᱚᱞᱟ ᱟᱹᱭᱩᱵ ᱞᱚᱵᱚᱬᱯᱩᱨ ᱛᱤᱧ ᱥᱮᱱ ᱞᱮᱱᱟ, ᱡᱤᱨᱟᱹᱣ ᱡᱚᱠᱷᱚᱱ ᱵᱮᱼᱠᱷᱮᱭᱟᱞᱛᱮ ᱴᱟᱠᱟ ᱛᱷᱩᱲᱤ ᱫᱚ ᱠᱩᱸᱭᱨᱮ ᱧᱩᱨ ᱮᱱ ᱛᱤᱧᱟ ᱾ ᱠᱩᱸᱭ ᱠᱷᱚᱱ ᱴᱟᱠᱟ ᱛᱷᱩᱲᱤ ᱨᱟᱠᱟᱵ ᱫᱚ ᱤᱧ ᱞᱟᱹᱜᱤᱫ ᱛᱮ ᱚᱦᱚᱣᱟᱱ ᱛᱟᱸᱦᱮᱜ ᱾ ᱚᱱᱟᱛᱮ ᱦᱚᱨᱛᱮ ᱥᱮᱱᱚᱜ ᱦᱚᱲ ᱦᱚᱼᱦᱚ ᱠᱟᱛᱮ ᱡᱚᱛᱚ ᱠᱟᱛᱷᱟᱹᱧ ᱞᱟᱹᱭ ᱟᱫᱮᱭᱟ, ᱟᱫᱚᱭ ᱢᱮᱛᱟᱜ ᱫᱤᱧᱟ, "ᱟᱢᱟᱜ ᱴᱟᱠᱟ ᱛᱷᱩᱲᱤᱧ ᱨᱟᱠᱟᱵᱟ, ᱛᱚᱵᱮ ᱟᱢ ᱪᱮᱫ ᱮᱢ ᱤᱢᱟᱹᱧ ᱟ ?" ᱟᱹᱫᱩᱧ ᱢᱮᱛᱟᱫ ᱫᱮᱭᱟ, "ᱚᱱᱟ ᱛᱷᱩᱲᱤ ᱠᱷᱚᱱ ᱡᱟᱸᱦᱟᱸ ᱛᱤᱱᱟᱹᱜ ᱩᱪᱤᱛᱮᱢ ᱵᱩᱡᱷᱟᱹᱣᱟ ᱤᱱᱟᱝ ᱤᱢᱟᱹᱧ ᱢᱮ" ᱾ ᱚᱱᱟ ᱛᱟᱭᱚᱢ ᱠᱩᱸᱭ ᱠᱷᱚᱱ ᱛᱷᱩᱲᱤ ᱚᱰᱚᱠ ᱠᱟᱛᱮ ᱵᱟᱨᱮᱭᱟ ᱮᱢ ᱛᱟᱭᱚᱢ ᱥᱟᱨᱮᱡᱟᱜ ᱫᱚ ᱡᱚᱛᱚᱭ ᱤᱫᱤ ᱠᱮᱜᱼᱟ ᱾ ᱚᱱᱟᱛᱮ ᱱᱭᱟᱭ ᱠᱚᱭᱤᱧ ᱦᱮᱡ ᱟᱠᱟᱱᱟ ᱾ ᱟᱹᱵᱤᱱᱟᱜ ᱥᱚᱥᱱᱚᱜ ᱨᱮ ᱡᱩᱫᱤ ᱱᱭᱟᱭ ᱵᱟᱹᱧ ᱧᱟᱢ ᱠᱷᱟᱱ ᱵᱟᱹᱧ ᱨᱩᱣᱟᱹᱲᱟ ᱾ 

     ᱨᱟᱡᱟ ᱟᱡᱟᱜ ᱠᱟᱛᱷᱟ ᱟᱸᱧᱡᱚᱢ ᱠᱟᱛᱮ ᱠᱩᱞᱤ ᱠᱮᱫᱮᱭᱟᱭ "ᱩᱱᱤ ᱦᱚᱲᱟᱜ ᱧᱩᱛᱩᱢ...? ᱪᱮᱫ ᱮ ᱠᱟᱹᱢᱤᱭᱟᱹ...? ᱚᱠᱟᱨᱮ ᱱᱤᱡ ᱠᱟᱱᱟᱭ...?  ᱩᱱᱤᱫᱩᱧ ᱧᱮᱞ ᱟᱠᱟᱫᱮᱭᱟ, ᱛᱚᱵᱮ ᱵᱩᱴᱟᱹ ᱠᱚᱫᱚ ᱵᱟᱹᱧ ᱵᱟᱰᱟᱭᱟ" ᱵᱟᱵᱽᱬᱮ ᱢᱮᱱ ᱠᱮᱜᱼᱟᱭ ᱾ 

          "ᱴᱷᱤᱠ ᱜᱮᱭᱟ  ᱾ ᱜᱟᱯᱟ ᱱᱚᱣᱟ ᱩᱫᱤ ᱠᱟᱛᱮ ᱡᱚᱛᱷᱟᱛ ᱠᱟᱹᱢᱤ ᱦᱚᱨᱟᱹᱧ ᱤᱫᱤᱭᱟ" ᱾ ᱛᱮᱦᱮᱧ ᱤᱧ ᱥᱟᱞᱟᱜ ᱡᱚᱢᱼᱧᱩ ᱠᱟᱛᱮ ᱡᱤᱨᱟᱹᱣ ᱡᱚᱝ ᱢᱮ ᱾ 

            ᱵᱟᱵᱽᱬᱮ, ᱨᱟᱡᱟ ᱦᱟᱜ ᱠᱟᱛᱷᱟᱭ ᱵᱟᱛᱟᱣ ᱠᱮᱜᱼᱟ, ᱟᱡᱟᱜ ᱫᱷᱚᱱ ᱧᱟᱢ ᱨᱩᱣᱟᱹᱲ ᱩᱭᱦᱟᱹᱨ ᱛᱮ ᱧᱤᱫᱟᱹ ᱡᱟᱠ ᱵᱟᱭ ᱡᱟᱹᱯᱤᱫ ᱫᱟᱲᱮᱭᱟᱫᱼᱟ ᱾ 

        ᱫᱚᱥᱟᱨ ᱦᱤᱞᱚᱜ ᱞᱚᱵᱚᱬᱯᱩᱨ ᱨᱤᱱ ᱡᱚᱛᱚ ᱦᱚᱲ ᱨᱟᱡᱽ ᱫᱚᱞᱟᱱ ᱛᱮᱠᱚ ᱦᱚᱼᱦᱚ ᱟᱫ ᱠᱚᱣᱟ ᱾ ᱵᱟᱵᱽᱬᱮ ᱩᱱᱤ ᱦᱚᱲᱮ ᱪᱤᱱᱦᱟᱹᱣ ᱠᱮᱫᱮᱭᱟ ᱾ ᱵᱟᱱᱟ ᱦᱚᱲ ᱟᱹᱠᱤᱱᱟᱜ ᱠᱟᱛᱷᱟ ᱠᱤᱱ ᱞᱟᱹᱭ ᱠᱮᱜᱼᱟ ᱾ ᱚᱠᱚᱭᱟᱜ ᱠᱟᱛᱷᱟ ᱴᱷᱤᱠ ᱵᱟᱠᱚ ᱵᱟᱰᱟᱭ ᱫᱟᱲᱮᱭᱟᱫᱼᱟ, ᱚᱱᱟᱛᱮ ᱨᱟᱡᱟ ᱦᱟᱜ ᱱᱭᱟᱭ ᱜᱮᱠᱚ ᱛᱟᱝᱜᱤ ᱟᱠᱟᱫᱼᱟ ᱾ ᱨᱟᱡᱟ ᱟᱡᱟᱜ ᱱᱤᱥᱯᱚᱛᱤ ᱟᱸᱧᱡᱚᱢᱟᱫ ᱠᱚᱣᱟᱜ, "ᱵᱟᱵᱽᱬᱮ ᱟᱨᱮᱼᱜᱮ ᱤᱨᱟᱹᱞ ᱟᱨ ᱩᱱᱤ ᱦᱚᱲᱫᱚ ᱠᱩᱲᱟᱹᱭ ᱞᱮᱠᱟᱛᱮ ᱵᱟᱨᱮᱭᱟ ᱥᱚᱱᱟ ᱴᱟᱠᱟᱭ ᱧᱟᱢᱟ" ᱾ 

     ᱫᱚᱞᱟᱱ ᱨᱤᱱᱤᱡ ᱜᱟᱹᱠᱷᱩᱲᱟᱱ ᱠᱚ ᱱᱚᱣᱟ ᱱᱤᱥᱯᱚᱛᱤ ᱵᱟᱠᱚ ᱠᱩᱥᱤ ᱟᱫ ᱛᱮ ᱨᱟᱡᱟ ᱠᱚ ᱢᱮᱛᱟᱫ ᱫᱮᱭᱟ, "ᱢᱤᱼᱢᱤᱫ ᱡᱚᱠᱷᱚᱱ ᱱᱭᱟᱭ ᱟᱨ ᱱᱭᱟᱭ ᱢᱤᱫ ᱞᱮᱠᱟᱜᱮ ᱢᱚᱱᱮ ᱦᱩᱭᱩᱜᱼᱟ, ᱩᱱ ᱡᱚᱠᱷᱚᱱ ᱞᱟᱥᱮᱨ ᱜᱮᱭᱟᱱ ᱵᱮᱵᱷᱟᱨ ᱠᱟᱛᱮ ᱯᱨᱚᱵᱷᱮᱫ ᱧᱮᱞ ᱦᱩᱭᱩᱜᱼᱟ ᱾ ᱵᱟᱵᱽᱬᱮ ᱛᱤᱥ ᱨᱮᱦᱚᱸ ᱵᱟᱭ ᱢᱮᱱ ᱟᱠᱟᱫᱼᱟ, "ᱟᱢ ᱡᱟᱸᱦᱟᱸ ᱛᱤᱱᱟᱹᱜ ᱮᱢ ᱮᱢᱚᱜᱼᱟ, ᱤᱱᱟᱝ ᱜᱤᱧ ᱤᱫᱤᱭᱟ" ᱾ 

      ᱤᱠᱷᱟᱹᱱ ᱱᱚᱣᱟ ᱠᱟᱛᱷᱟ ᱨᱮᱱᱟᱜ ᱡᱟᱭ ᱩᱫᱤ ᱠᱟᱛᱮ ᱩᱱᱤ ᱦᱚᱲ ᱴᱟᱠᱟ ᱞᱚᱵᱽᱛᱮ ᱟᱸᱫᱷᱟ ᱮᱱᱟᱭ ᱾ ᱟᱡᱽ ᱴᱷᱮᱱ ᱟᱨᱮᱼᱜᱮ ᱤᱨᱟᱹᱞ ᱥᱚᱱᱟ ᱴᱟᱠᱟ ᱫᱚᱦᱚ ᱠᱟᱛᱮ, ᱵᱟᱨᱮᱭᱟ ᱥᱩᱢᱩᱝ ᱵᱟᱵᱽᱬᱮ ᱨᱩᱣᱟᱹᱲ ᱟᱫᱮᱭᱟᱭ ᱾ ᱱᱚᱣᱟ ᱫᱚ ᱱᱟᱥᱮ ᱦᱚᱸ ᱩᱪᱤᱛ ᱵᱟᱝ ᱦᱩᱭᱩᱜ ᱠᱟᱱᱟ ᱾ 

      ᱨᱟᱡᱟ ᱡᱚᱥᱚᱥᱤᱭᱟᱹ ᱦᱟᱜ ᱵᱤᱪᱟᱹᱨ ᱨᱟᱡᱽ ᱵᱟᱹᱠᱷᱩᱞ ᱨᱤᱱ ᱜᱟᱹᱠᱷᱩᱲᱟᱱ ᱥᱟᱸᱣ ᱥᱮᱴᱮᱨ ᱠᱚ ᱛᱟᱸᱦᱮᱞᱮᱱ ᱥᱟᱱᱟᱢ ᱯᱨᱚᱡᱟ ᱠᱚ ᱠᱩᱥᱤᱭᱟᱫᱼᱟ ᱾ 

ᱢᱩᱲᱩᱛᱮᱫᱼ ᱪᱟᱸᱫᱚ ᱢᱟᱢᱚ (ᱚᱠᱴᱚᱵᱚᱨ ᱒᱐᱐᱔)

ᱛᱩᱢᱟᱹᱞᱤᱭᱟᱹᱼ ᱵᱟᱹᱨᱤᱭᱟᱹᱲ ᱦᱮᱢᱵᱨᱚᱢ

                   ᱡᱷᱚᱨᱟᱰᱤ, ᱢᱚᱭᱩᱨᱵᱷᱚᱸᱡᱽ ᱚᱰᱤᱥᱟ