DANGUWAN MONE ᱰᱟᱸᱜᱣᱩᱣᱟᱹ ᱢᱚᱱᱮ A Santali Dialogue in Santali Script (Santali Shayari Book)

᱑. ᱟᱢ ᱠᱷᱟᱹᱛᱤᱨ ᱵᱮᱱᱟᱣ ᱮᱱᱟᱹᱧ 

     ᱪᱷᱚᱲᱮ ᱚᱱᱚᱞᱤᱭᱟᱹ,

     ᱡᱚᱛᱚ ᱦᱚᱲᱟᱜ ᱢᱚᱱᱮ ᱵᱟᱜᱟᱱ ᱨᱮ 

     ᱤᱧ ᱜᱮ ᱥᱚ~ᱫᱷᱟᱬ ᱠᱤᱭᱟᱹ ᱾ 

᱒. ᱨᱚᱦᱚᱭ ᱠᱮᱜ ᱟᱹᱧ ᱥᱚ~ᱫᱷᱟᱬ ᱠᱤᱭᱟᱹ

    ᱵᱟᱦᱟ ᱫᱟᱨᱮ ᱰᱟᱸᱜᱣᱩᱣᱟᱹ ᱢᱚᱱᱮᱨᱮ, 

    ᱡᱚ ᱵᱟᱦᱟ ᱠᱚᱜ ᱢᱟ ᱢᱮᱱᱛᱮ ᱟᱸᱥᱚᱜ ᱟᱹᱧ

    ᱚᱱᱟ ᱚᱞᱚᱜ ᱠᱚᱲᱟ ᱠᱩᱲᱤ ᱨᱮ ᱾ 

᱓. ᱰᱟᱸᱜᱣᱩᱣᱟᱹ ᱢᱚᱱᱮ ᱫᱚ ᱟᱥᱟᱲ ᱵᱚᱝᱜᱟ

    ᱜᱟᱰᱟ ᱢᱩᱰᱩ ᱵᱟᱱ ᱫᱟᱜ ᱞᱮᱠᱟ, 

    ᱦᱟᱨᱟ ᱛᱚᱨᱟ ᱠᱩᱲᱤ ᱥᱟᱞᱟᱜ ᱨᱚᱲ ᱞᱟᱸᱱᱫᱽ 

    ᱚᱱᱮ ᱡᱤᱣᱤ ᱨᱮᱭᱟᱲ ᱫᱟᱜ ᱞᱮᱠᱟ ᱾ 

᱔. ᱠᱩᱲᱤ ᱥᱟᱞᱟᱜ ᱦᱚᱨᱛᱮ ᱥᱮᱱᱚᱜ ᱢᱮ

    ᱡᱚᱛᱚ ᱜᱮ ᱠᱚ ᱵᱷᱟᱹᱵᱤ ᱵᱟᱹᱲᱤᱡ ᱜᱮ,

    ᱚᱱᱮ ᱡᱮᱢᱚᱱ ᱰᱟᱸᱜᱣᱩᱣᱟᱹ ᱠᱩᱲᱤ ᱥᱟᱸᱣ ᱩᱠᱩ

    ᱫᱟᱱᱟᱝ ᱨᱚᱲ ᱞᱟᱸᱱᱫᱽ ᱫᱚ ᱱᱟᱥᱮ ᱜᱷᱟᱹᱲᱤ ᱡᱟᱜᱮ ᱾ 

᱕. ᱢᱩᱨᱩᱠ ᱠᱩᱲᱤ ᱠᱚᱞᱮᱡᱽ ᱠᱚᱲᱟ ᱨᱮ

    ᱨᱚᱲ ᱞᱟᱸᱱᱫᱽ ᱟᱥᱟ,

    ᱚᱱᱮ ᱡᱮᱢᱚᱱ ᱛᱮᱛᱟᱝ ᱵᱮᱲᱟ 

    ᱵᱷᱩᱜᱟᱹᱜ ᱴᱩᱠᱩᱡ ᱫᱟᱜ ᱟᱥᱟ ᱾ 

᱖. ᱜᱩᱛᱤ ᱠᱚᱲᱟ ᱚᱞᱚᱜ ᱠᱩᱲᱤ ᱠᱷᱟᱹᱛᱤᱨ

    ᱥᱤᱧ ᱧᱤᱫᱟᱹ ᱫᱟᱜ ᱭᱟᱢ ᱰᱟᱹᱱᱩᱜ,

    ᱱᱟᱦᱟᱜ ᱚᱞᱚᱜ ᱠᱩᱲᱤ ᱥᱟᱫᱟ ᱠᱟᱜᱚᱡᱽ

    ᱞᱮᱠᱟ ᱢᱚᱱᱮ ᱜᱮ ᱛᱟᱠᱚ ᱵᱟᱹᱱᱩᱜ ᱾ 

᱗. ᱵᱤᱸᱰᱤ ᱵᱟᱝᱠᱷᱟᱱ ᱴᱷᱤᱞᱤ ᱴᱩᱠᱩᱡ

    ᱡᱮᱢᱚᱱ ᱵᱟᱝ ᱜᱮ ᱫᱚᱲᱚᱢᱚᱜ ᱟ,

    ᱰᱟᱸᱝᱜᱣᱩᱣᱟᱹ ᱢᱚᱱᱮ ᱥᱤᱵᱤᱞ ᱨᱚᱲ ᱞᱟᱸᱱᱫᱽ

    ᱵᱟᱝᱠᱷᱟᱱ ᱵᱟᱝᱜᱮ ᱥᱚᱲᱚᱢᱚᱜ-ᱟ ᱾

᱘. ᱨᱚᱲ ᱞᱟᱸᱱᱫᱽ ᱫᱚ ᱵᱟᱭ ᱵᱟᱪᱷᱟᱣᱟ

     ᱦᱮᱸᱫᱮ, ᱮᱥᱮᱞ, ᱠᱟᱱᱟ, ᱪᱷᱚᱴᱠᱟ,

     ᱚᱱᱟᱛᱮᱜᱮ ᱯᱟᱞᱮ ᱱᱟᱦᱟᱜ ᱠᱚᱲᱟ ᱠᱩᱲᱤ ᱫᱚᱠᱚ

     ᱟᱸᱧᱜᱤᱨᱚᱜ ᱠᱟᱱᱟ ᱥᱟᱸᱜᱤᱧ ᱤᱴᱟᱹ ᱵᱷᱟᱴᱟ ᱾ 

᱙. ᱛᱟᱞᱟ ᱴᱷᱤᱞᱤ ᱫᱟᱜ ᱞᱮᱠᱟ ᱰᱟᱸᱝᱜᱣᱩᱣᱟᱹ 

     ᱢᱚᱱᱮ ᱫᱚ ᱪᱷᱤᱞᱠᱟᱹ ᱪᱷᱤᱞᱠᱤᱜ,

     ᱦᱟᱴ ᱯᱟᱛᱟ ᱨᱮ ᱦᱟᱨᱟ ᱛᱚᱨᱟ ᱠᱩᱲᱤ ᱪᱩᱲᱤ

     ᱠᱤᱨᱤᱧ ᱨᱮ ᱡᱮᱢᱚᱱ ᱵᱷᱤᱞᱠᱤᱜ ᱾ 

᱑᱐. ᱟᱥᱟᱲ ᱵᱚᱝᱜᱟ ᱦᱩᱞᱠᱟᱹ ᱡᱟᱹᱯᱤᱫ,

      ᱦᱩᱰᱩᱨ ᱥᱟᱸᱶᱛᱮ ᱵᱤᱡᱽᱞᱤ ᱡᱷᱟᱞᱠᱟᱣ,

      ᱯᱩᱭᱞᱩ ᱧᱤᱫᱟᱹ ᱫᱩᱞᱟᱹᱲᱤᱭᱟᱹ ᱥᱟᱞᱟᱜ

      ᱧᱟᱯᱟᱢ ᱡᱩᱣᱟᱹᱱ ᱡᱤᱣᱤ ᱫᱚ ᱢᱟᱞᱠᱟᱣ ᱜᱚᱫᱚᱜ ᱾ 

᱑᱑. ᱵᱟᱲᱮ ᱫᱟᱨᱮ ᱠᱩᱴᱟᱹᱢ ᱞᱮᱠᱷᱟᱱ

      ᱞᱚᱲᱮ ᱫᱟᱜ ᱡᱚᱨᱚᱜ ᱜᱮᱭᱟ,

      ᱚᱱᱮ ᱡᱮᱢᱚᱱ ᱪᱷᱟᱹᱰᱩᱭ ᱠᱩᱲᱤ ᱦᱚᱸ ᱟᱹᱰᱤ

      ᱦᱚᱲᱛᱮᱢ ᱠᱩᱞᱤ ᱞᱮᱠᱷᱟᱱ ᱮᱫᱽᱨᱚᱜ ᱜᱮᱭᱟ ᱾

᱑᱒. ᱯᱩᱭᱞᱩ ᱧᱮᱯᱮᱞ ᱨᱮ ᱢᱩᱞᱩᱡ ᱞᱟᱸᱫᱟ ᱢᱮᱥᱟ

      ᱱᱟᱥᱮᱢ ᱨᱚᱲᱟ ᱫᱤᱧᱟᱹ

      ᱰᱟᱸᱝᱜᱣᱩᱣᱟᱹ ᱠᱚᱲᱟ ᱜᱚᱴᱟᱞ ᱢᱚᱱᱮ

      ᱢᱟᱥᱮᱢ ᱦᱤᱨᱤᱡ ᱯᱟᱹᱥᱤᱨ ᱠᱮᱫ ᱛᱤᱧᱟ ᱾ 

᱑᱓. ᱤᱧᱟᱜ ᱢᱚᱱᱮ ᱨᱮ ᱟᱢᱜᱮ ᱯᱩᱭᱞᱩᱢ

      ᱚᱯᱮᱞ ᱞᱮᱱᱟ ᱛᱚᱣᱟ ᱵᱟᱦᱟ ᱞᱮᱠᱟ,

      ᱟᱫᱷᱟ ᱫᱤᱱ ᱨᱮ ᱧᱤᱨ ᱵᱟᱹᱜᱤᱭᱟᱫᱤᱧᱟᱢ

      ᱟᱢᱫᱚ ᱠᱮᱪᱟᱜ ᱪᱟᱸᱫᱚ ᱞᱮᱠᱟ ᱾ 

᱑᱔. ᱵᱷᱩᱴᱩᱜ ᱵᱟᱦᱟ ᱧᱮᱞᱚᱜ ᱡᱷᱟᱹᱞ

      ᱠᱷᱚᱱ ᱜᱮ ᱟᱹᱰᱤ ᱪᱚᱦᱚᱴ,

      ᱪᱷᱟᱹᱰᱩᱭ ᱠᱩᱲᱤ ᱨᱚᱲ ᱞᱟᱸᱱᱫᱽ

      ᱟᱹᱰᱤ ᱛᱮᱫ ᱜᱮᱠᱚ ᱯᱚᱦᱚᱴᱟ ᱾ 

᱑᱕. ᱦᱟᱹᱱᱠᱩ ᱧᱮᱞ ᱠᱚᱢ ᱚᱞᱚᱜ ᱠᱩᱲᱤ

       ᱵᱟᱸᱫᱮ ᱛᱤᱱᱟᱹᱜ ᱨᱚᱝ ᱰᱷᱚᱝ,

       ᱟᱞᱚ ᱥᱮᱭᱟᱢ ᱯᱟᱸᱡᱟ ᱠᱚᱣᱟ ᱱᱩᱠᱩ

       ᱡᱚᱛᱚ ᱵᱷᱚᱸᱫᱚᱨ ᱵᱷᱚᱝ ᱾ 

᱑᱖. ᱢᱟᱹᱴᱭᱟᱹᱲ ᱦᱟᱥᱟ ᱵᱷᱤᱛ ᱯᱤᱸᱰᱟᱹ

      ᱪᱤᱠᱟᱹᱬ ᱜᱮ ᱵᱟᱹᱱᱩᱜ,

      ᱟᱞᱚᱢ ᱜᱚᱨᱚᱡᱚᱜ ᱠᱩᱲᱤ ᱚᱞᱚᱜ ᱠᱚᱲᱟ

      ᱢᱚᱱᱮ ᱱᱤᱛᱚᱜ ᱴᱷᱤᱠᱟᱹᱬ ᱜᱮ ᱵᱟᱹᱱᱩᱜ ᱾ 

᱑᱗. ᱪᱟᱹᱛ ᱵᱟᱹᱭᱥᱟᱠ ᱨᱟᱭᱞᱟ ᱥᱤᱛᱩᱝ

      ᱦᱚᱭ ᱫᱚ ᱦᱟᱫᱟᱨ ᱦᱟᱫᱟᱨ,

      ᱚᱱᱮ ᱡᱮᱢᱚᱱ ᱦᱟᱴᱯᱟᱛᱟ ᱨᱮ ᱪᱷᱟᱹᱰᱩᱭ ᱠᱩᱲᱤ

      ᱠᱚᱲᱟ ᱥᱟᱢᱟᱝ ᱨᱮ ᱨᱚᱲᱟᱭ ᱯᱷᱟᱫᱟᱨ ᱯᱷᱟᱫᱟᱨ

᱑᱘. ᱚᱞ ᱟᱹᱫᱤᱧᱟᱢ ᱡᱤᱣᱤ ᱨᱮ ᱨᱚᱝᱜᱚ
       ᱵᱮᱨᱚᱝᱜᱚ ᱫᱩᱞᱟᱹᱲ ᱪᱤᱴᱷᱤ,
        ᱮᱱᱦᱚᱸ ᱢᱚᱱᱮ ᱫᱚ ᱵᱟᱭ ᱜᱚᱴᱟ ᱞᱮᱱᱟ
        ᱟᱨᱦᱚᱸ ᱛᱟᱭᱚᱢ ᱠᱷᱚᱱᱮᱢ ᱥᱤᱴᱤ ᱾

᱑᱙. ᱟᱢ ᱜᱮᱛᱚ ᱤᱧᱟᱜ ᱢᱚᱱᱮ
       ᱠᱷᱟᱱᱪᱟᱨ ᱨᱤᱱᱤᱡ ᱢᱤᱨᱩ,
       ᱪᱮᱫ ᱛᱮᱢ ᱠᱷᱟᱴᱚᱭᱮᱱᱟ ᱢᱤᱨᱩ ᱥᱚᱦᱟᱜᱽ
        ᱠᱷᱟᱱᱪᱟᱨ ᱠᱷᱚᱱᱟᱜ ᱪᱟᱜᱼᱮᱢ ᱧᱤᱨᱩᱜ ᱾

᱒᱐. ᱟᱹᱢᱤᱧ ᱟᱯᱱᱟᱨ ᱢᱮᱭᱟ ᱢᱮᱱᱛᱮ
      ᱫᱚᱦᱚ ᱞᱮᱜ ᱟᱹᱧ ᱢᱚᱱᱮ ᱨᱮ ᱟᱥᱟ,
      ᱤᱠᱷᱟᱹᱱ ᱱᱤᱛᱤᱧ ᱵᱟᱰᱟᱭ ᱠᱮᱜ-ᱟ
      ᱠᱟᱹᱦᱩ ᱛᱩᱠᱟᱹᱨᱮ ᱠᱚᱭᱮᱞ ᱡᱮᱢᱚᱱᱮ ᱵᱟᱥᱟᱜ ᱾

᱒᱑. ᱫᱩᱞᱟᱹᱲᱤᱭᱟᱹ ᱟᱢᱜᱮ ᱰᱟᱸᱝᱜᱣᱩᱣᱟᱹ
      ᱢᱚᱱᱮ ᱨᱤᱱᱤᱡ ᱡᱩᱣᱟᱹᱱ ᱠᱟᱰᱟ ᱾

᱒᱒. ᱥᱟᱹᱨᱤ ᱜᱮ ᱟᱢᱟᱜ ᱰᱟᱸᱝᱜᱣᱩᱣᱟᱹ ᱢᱚᱱᱮ ᱨᱮ
      ᱤᱧᱜᱮ ᱦᱚᱨᱚᱜ ᱦᱟᱨᱢᱟᱞᱟ,
      ᱚᱱᱟ ᱪᱤᱠᱟᱹ ᱛᱩᱫᱽ ᱜᱤᱰᱤ ᱵᱟᱪᱮᱢ
      ᱵᱩᱡᱷᱟᱹᱣ ᱞᱮᱜᱟ ᱡᱤᱣᱤ ᱨᱮ ᱡᱟᱞᱟ ᱾

᱒᱓. ᱤᱧᱟᱜ ᱡᱤᱣᱤ ᱡᱷᱟᱹᱣ ᱨᱮ ᱠᱚᱭᱮᱞ ᱨᱩᱯ ᱛᱮ
      ᱟᱢ ᱮᱢ ᱟᱸᱫᱚᱲ ᱞᱮᱜᱟ ᱫᱩᱞᱟᱹᱲ ᱟᱲᱟᱝ ᱛᱮ,
      ᱚᱱᱟ ᱛᱮ ᱜᱮ ᱯᱟᱞᱮ ᱞᱟᱦᱟ ᱞᱤᱱᱟᱹᱧ
      ᱟᱭᱳ ᱵᱟᱵᱟ ᱢᱟᱬᱟᱝ ᱛᱮ ᱾

᱒᱔. ᱟᱢᱫᱚᱢ ᱦᱩᱭ ᱠᱚᱜ ᱟᱞᱮ
      ᱵᱟᱲᱜᱮ ᱢᱟᱹᱞᱤ ᱵᱟᱦᱟ,
      ᱤᱧ ᱜᱮ ᱦᱩᱱᱟᱹᱝ ᱩᱠᱩ ᱫᱟᱱᱟᱝ
      ᱜᱚᱫ ᱠᱮᱢᱟᱧ ᱞᱟᱦᱟ ᱾

᱒᱕. ᱜᱤᱫᱽᱨᱟᱹ ᱨᱮᱱᱟᱜ ᱠᱩᱞᱦᱤ ᱫᱷᱩᱲᱤ
       ᱮᱱᱮᱡ ᱠᱟᱛᱷᱟ ᱵᱟᱢ ᱩᱭᱦᱟᱹᱨ ᱞᱮᱜ-ᱟ,
       ᱰᱟᱦᱟᱨ ᱫᱷᱩᱲᱤ ᱛᱮᱞᱟᱝ ᱤᱛᱩᱫ ᱥᱤᱸᱫᱩᱨ
       ᱞᱮᱱᱟ ᱯᱟᱪᱷᱮᱢ ᱦᱤᱲᱤᱧ ᱠᱮᱜ-ᱟ ᱾

᱒᱖. ᱡᱟᱹᱯᱤᱫ ᱥᱟᱲᱟ ᱥᱟᱹᱛᱤᱧ ᱠᱩᱠᱢᱩ ᱛᱮ
      ᱧᱮᱞᱟᱹᱧ ᱟᱢᱟᱜ ᱨᱩᱯ ᱟᱹᱨᱥᱤ,
      ᱚᱱᱟᱛᱮ ᱜᱮ ᱯᱟᱞᱮ ᱥᱮᱛᱟᱜ ᱵᱮᱨᱮᱫᱚᱜ
      ᱵᱟᱹᱧ ᱩᱭᱦᱟᱹᱨ ᱚᱞ ᱪᱤᱠᱤ ᱯᱟᱹᱨᱥᱤ ᱾

᱒᱗. ᱟᱥᱟ ᱞᱮᱱᱟᱹᱧ ᱟᱢ ᱴᱷᱮᱱ ᱯᱩᱭᱞᱩ
      ᱫᱩᱞᱟᱹᱲ ᱨᱮᱱᱟᱜ ᱨᱟᱥᱟ,
       ᱤᱠᱷᱟᱹᱱ ᱟᱢᱫᱚ ᱟᱥᱟ ᱢᱚᱱᱮᱢ
      ᱫᱚᱦᱚ ᱠᱮᱜ-ᱟ ᱵᱟᱥᱟ ᱾

᱒᱘. ᱫᱩᱞᱟᱹᱲ ᱟᱢᱫᱚ ᱪᱮᱫᱟᱜ ᱱᱚᱝᱠᱟᱢ
       ᱦᱤᱡᱩᱜ-ᱟ ᱡᱟᱹᱯᱤᱫ ᱥᱟᱲᱟ ᱥᱟᱹᱛᱤᱧ,
       ᱚᱱᱟ ᱪᱤᱠᱟᱹ ᱤᱧᱫᱩᱧ ᱴᱷᱤᱠᱟᱹᱭᱟ
      ᱤᱧᱢᱟ ᱩᱫᱩᱨ ᱡᱟ.ᱯᱤᱫ ᱛᱤᱧ ᱾

᱒᱙. ᱮ ᱫᱩᱞᱟᱹᱲ ᱤᱧ ᱧᱮᱞ ᱛᱮ ᱦᱟᱴ
       ᱯᱟᱛᱟ ᱨᱮ ᱪᱟᱜ ᱮᱢ ᱫᱷᱩᱞᱩᱯ,
       ᱚᱱᱟ ᱛᱮᱜᱮ ᱯᱟᱞᱮ ᱟᱞᱮ ᱵᱩᱰᱷᱤ ᱫᱚ
       ᱨᱟᱹᱯᱩᱫ ᱥᱤᱞᱯᱤᱧ ᱦᱚᱸᱭ ᱠᱩᱞᱩᱯ‌ ᱾

᱓᱐. ᱟᱢ ᱥᱟᱞᱟᱜ ᱨᱚᱯᱚᱲ ᱠᱷᱟᱹᱛᱤᱨ ᱫᱤᱱ ᱜᱮᱧ
      ᱥᱮᱱᱚᱜ ᱟᱯᱮ ᱚᱲᱟᱜ ᱠᱤᱨᱤᱧ ᱨᱟᱹᱱᱩ,
      ᱟᱯᱮ ᱵᱩᱰᱷᱤ ᱛᱟᱦᱮᱱ ᱛᱩᱞᱩᱡ ᱫᱤᱱ ᱜᱮ
      ᱢᱤᱛᱟᱹᱧᱟᱭ ᱮᱭᱟ ᱵᱟᱹᱱᱩᱜ ᱾

᱓᱑. ᱠᱟᱛᱷᱟᱢ ᱮᱢᱟ ᱫᱤᱧᱟ
       ᱥᱤᱢᱲᱟᱹ ᱨᱮᱞᱟᱝ ᱧᱟᱯᱟᱢᱟ,
       ᱧᱟᱯᱟᱢ ᱛᱟᱭᱚᱢ ᱚᱸᱰᱮᱜᱮ
       ᱢᱟᱞᱟ ᱢᱩᱫᱟᱹᱢ ᱫᱚᱞᱟᱝ ᱮᱯᱮᱢᱟ ᱾

᱓᱒. ᱧᱟᱯᱟᱢ ᱠᱟᱛᱷᱟ ᱥᱟᱹᱨᱤ ᱮᱱᱟ
      ᱥᱟᱭᱠᱮᱞ ᱨᱮᱞᱟᱝ ᱵᱷᱟᱹᱨᱤ ᱮᱱᱟ,
      ᱟᱬᱜᱚᱢ ᱦᱟᱥᱟ ᱞᱮᱠᱟ ᱟᱞᱟᱝ ᱫᱚ
      ᱞᱟᱴᱟ ᱥᱮᱫ ᱞᱟᱝ ᱜᱟᱹᱨᱤᱭᱮᱱᱟ ᱾

᱓᱓. ᱛᱤᱱᱟᱹᱜ ᱮᱢ ᱥᱤᱵᱤᱞᱟᱹᱫᱤᱧᱟ,
      ᱛᱤᱱᱟᱹᱜ ᱮᱢ ᱜᱚᱨᱚᱡᱽ ᱟᱹᱫᱤᱧᱟ ᱛᱤᱱᱟᱹᱜ ᱮᱢ
      ᱫᱩᱞᱟᱹᱲ ᱠᱤᱫᱤᱧ ᱵᱟᱪᱚᱢ ᱴᱷᱤᱠᱟᱹ ᱦᱟᱱᱟ,
      ᱟᱢ ᱩᱭᱦᱟᱹᱨ ᱛᱮ ᱟᱢ ᱵᱷᱟᱵᱽᱱᱟ ᱛᱮ
     ᱦᱮᱸᱫᱮ ᱩᱵᱦᱚᱸ ᱯᱟᱹᱱᱰᱩ ᱮᱱᱟ ᱦᱚᱲ ᱠᱚ
      ᱞᱟᱸᱱᱫᱟ ᱦᱟᱹᱧ ᱠᱟᱱᱟ ᱱᱤᱛ ᱢᱟ ᱦᱟᱲᱟᱢ ᱵᱟᱱᱟ

᱓᱔. ᱟᱢ ᱜᱳ ᱫᱩᱞᱟᱹᱲ ᱥᱟᱡᱟᱣ
      ᱜᱚᱫᱚᱜ ᱢᱮ ᱨᱚᱱᱮ ᱵᱚᱱᱮ,
      ᱥᱮᱱᱚᱜ ᱠᱷᱟᱱᱮᱢ ᱰᱟᱸᱝᱜᱣᱩᱣᱟᱹ
      ᱜᱟᱹᱰᱤ ᱛᱤᱸᱜᱩ ᱟᱠᱟᱱ ᱦᱟᱱᱮ ᱾

᱓᱕. ᱦᱚᱨᱚᱜ ᱟᱠᱟᱜ ᱟᱹᱧ ᱛᱤᱨᱮ ᱢᱚᱴᱟ ᱪᱩᱲᱤ,
      ᱠᱟᱴᱟ ᱨᱮ ᱵᱤᱱᱰᱤ ᱠᱷᱟᱹᱰᱣᱟᱹ
      ᱞᱩᱛᱩᱨ ᱨᱮ ᱫᱚᱣᱟᱞ ᱯᱟᱜᱽᱨᱟ,
     ᱞᱚᱜᱚᱱᱚᱜ ᱥᱟᱹᱱᱟᱹᱧ ᱛᱟᱲᱟᱢ ᱜᱚᱫᱟᱹᱧ
     ᱯᱟᱞᱮ ᱦᱚᱥᱚᱨ ᱧᱩᱨᱩᱜ ᱫᱤᱯᱤᱞ ᱜᱷᱟᱜᱽᱨᱟ ᱾

᱓᱖. ᱠᱩᱲᱤ ᱦᱚᱯᱚᱱ ᱥᱟᱭᱟ ᱥᱟᱹᱲᱤ ᱠᱚ
     ᱵᱟᱸᱫᱮ ᱞᱮᱠᱷᱟᱱ ᱟᱹᱰᱤ ᱪᱚᱨᱚᱠ ᱠᱚ ᱧᱮᱞᱚᱜ,
     ᱚᱱᱠᱟ ᱛᱮᱜᱮ ᱯᱟᱞᱮ ᱚᱞᱚᱜ ᱠᱚᱲᱟ ᱫᱚ ᱱᱩᱠᱩ
ᱩᱭᱦᱟᱹᱨᱛᱮ ᱯᱚᱨᱤᱠᱷᱭᱟ ᱠᱚᱨᱮ ᱦᱚᱸᱠᱚ ᱯᱷᱮᱞᱚᱜ

᱓᱗. ᱫᱩᱞᱟᱹᱲ ᱟᱞᱚ ᱥᱮᱨᱮᱢ ᱨᱟᱪᱟᱜᱚᱜ-ᱟ
      ᱟᱧᱪᱟᱨ ᱨᱮ ᱫᱚ,
      ᱠᱩᱲᱤ ᱡᱟᱹᱛᱤ ᱩᱰᱟᱹᱣᱜ ᱪᱮᱬᱮ
      ᱚᱦᱚᱭ ᱛᱟᱸᱦᱮᱸ ᱠᱚᱜ-ᱟ ᱠᱷᱟᱱᱪᱟᱨᱮᱫᱚ ᱾

᱓᱘. ᱱᱟᱦᱟᱜ ᱡᱩᱜᱽ ᱟᱹᱛᱩ ᱴᱚᱞᱟ ᱨᱮᱜᱮ
       ᱠᱚᱲᱟ ᱠᱩᱲᱤ ᱫᱚᱠᱚ ᱨᱚᱲᱟ,
       ᱤᱠᱷᱟᱹᱱ ᱵᱟᱠᱚ ᱴᱷᱤᱠᱟᱹᱭᱟ ᱥᱟᱹᱜᱟᱹᱭ
       ᱛᱟᱠᱚᱫᱚ ᱜᱚᱲᱟ ᱾

᱓᱙. ᱨᱚᱫ ᱪᱤᱠᱟᱹᱬ ᱠᱩᱲᱤ ᱞᱚᱵᱽ ᱛᱮ ᱰᱟᱸᱝᱜᱣᱩᱣᱟᱹ
      ᱢᱚᱱᱮ ᱟᱹᱛᱷᱟᱹᱣᱲᱤ ᱟᱞᱚᱢ ᱞᱟᱴᱷᱟᱭ ᱛᱟᱢᱟ,
      ᱫᱷᱤᱱᱟᱹᱝ ᱵᱤᱫᱟᱹᱞ ᱦᱟᱯᱮᱢ ᱴᱷᱤᱠᱟᱹᱭᱟ
      ᱡᱩᱣᱟᱹᱱ ᱡᱤᱣᱤ ᱫᱚᱭ ᱢᱟᱴᱷᱟᱣ ᱛᱟᱢᱟ ᱾

᱔᱐. ᱫᱟᱜ ᱨᱤᱱ ᱦᱟᱹᱠᱩ ᱠᱟᱴᱠᱚᱢ ᱫᱚ
      ᱵᱚᱰᱮ ᱫᱟᱜ ᱜᱮᱠᱚ ᱠᱷᱚᱡᱟ
      ᱚᱱᱟ ᱛᱮᱜᱮ ᱯᱟᱞᱮ ᱰᱟᱸᱝᱜᱣᱩᱣᱟᱹ ᱠᱚᱲᱟ
      ᱠᱩᱲᱤ ᱜᱮ ᱰᱷᱮᱨ ᱛᱮᱫ ᱫᱚᱠᱚ ᱚᱠᱟ ᱾

᱔᱑. ᱵᱟᱲᱜᱮ ᱠᱩᱸᱫᱽᱨᱤ ᱱᱟᱹᱬᱤ ᱫᱚ
      ᱵᱟᱭ ᱵᱟᱪᱷᱟᱣᱟ ᱡᱟᱹᱱᱩᱢ ᱡᱷᱟᱴᱟ,
      ᱚᱱᱮ ᱡᱮᱢᱚᱱ ᱪᱷᱟᱹᱰᱩᱭ ᱠᱩᱲᱤ ᱵᱟᱭ
      ᱠᱷᱟᱹᱛᱤᱨᱟᱜ ᱟ ᱠᱚᱲᱟ ᱞᱟᱴᱟ ᱾

᱔᱒. ᱵᱟᱦᱟ ᱵᱟᱲᱜᱮ ᱨᱮᱫᱚ ᱵᱟᱦᱟ
      ᱮᱱᱟᱝᱜᱮ ᱥᱚᱵᱷᱟᱜ-ᱟ,
      ᱚᱱᱟ ᱛᱮᱜᱮ ᱢᱩᱨᱩᱠ ᱠᱩᱲᱤ ᱫᱚ ᱥᱟᱸᱭᱟ
      ᱥᱟᱹᱲᱤ ᱛᱮᱦᱚᱸᱠᱚ ᱞᱚᱵᱷᱟᱣᱚᱵᱼᱟ ᱾

᱔᱓. ᱟᱥᱟᱲ ᱵᱚᱝᱜᱟ ᱜᱮ ᱟᱦᱟᱨ ᱯᱩᱠᱷᱨᱤ
      ᱫᱟᱜ ᱫᱚ ᱪᱮᱦᱮᱞ ᱪᱮᱯᱮᱞ ᱧᱮᱞᱚᱜ,
      ᱦᱟᱸᱰᱤ ᱵᱷᱟᱹᱴᱤ ᱨᱮ ᱠᱩᱲᱤ
       ᱦᱚᱨᱚᱜ ᱠᱟᱜ ᱢᱟᱭ ᱯᱷᱚᱨᱚᱠ
      ᱛᱚᱵᱮ ᱮᱱᱟᱝ ᱦᱟᱸᱰᱤ ᱫᱚ ᱥᱮᱞᱚᱜ ᱾

᱔᱔. ᱠᱚᱲᱟ ᱠᱩᱲᱤ ᱡᱩᱜᱽ ᱱᱤᱛᱚᱜ
      ᱡᱩᱣᱟᱹᱱ ᱨᱮᱱᱟᱜ ᱯᱤᱨᱤᱛ ᱢᱟᱛᱟᱞ,
      ᱵᱟᱹᱭ ᱵᱟᱹᱭ ᱛᱮ ᱟᱹᱛᱩ ᱴᱚᱞᱟ ᱨᱮ ᱥᱟᱹᱜᱟᱹᱭ
      ᱥᱟᱜᱟᱫᱚᱜ ᱠᱟᱱ ᱥᱚᱨᱚᱜᱽ ᱯᱟᱛᱟᱞ ᱾

᱔᱕. ᱦᱟᱨᱟ ᱞᱮᱱ ᱠᱷᱟᱱ ᱱᱟᱹᱬᱤ
      ᱡᱷᱟᱴᱟ ᱫᱚ ᱡᱷᱟᱹᱰᱩ ᱜᱮᱭᱟ,
     ᱰᱟᱸᱝᱜᱣᱩᱣᱟᱹ ᱢᱚᱱᱮ ᱩᱠᱩ ᱫᱟᱱᱟᱝ ᱨᱚᱲ ᱞᱟᱸᱱᱫᱽ
      ᱢᱚᱱ ᱫᱚ ᱟᱹᱲᱡᱷᱟᱹᱣᱜ ᱜᱮᱭᱟ ᱾

᱔᱖. ᱱᱟᱦᱟᱜ ᱚᱞᱚᱜ ᱠᱩᱲᱤ ᱥᱮᱢᱯᱚ ᱥᱟᱵᱚᱱ
      ᱩᱵᱽ ᱫᱚ ᱯᱤᱴᱤ ᱯᱤᱴᱤ,
      ᱵᱟᱝ ᱵᱟᱰᱟᱭᱚᱜ ᱟ ᱦᱟᱴ ᱯᱟᱛᱟ ᱠᱚᱲᱟ ᱠᱤᱨᱤᱧ
    ᱠᱷᱟᱞᱟᱜ ᱞᱟᱹᱰᱩ ᱡᱚᱢ ᱠᱟᱜᱼᱟ ᱠᱚ ᱪᱟᱴᱟ ᱪᱟᱹᱴᱤ
   
᱔᱗. ᱵᱟᱡᱟᱨ ᱦᱟᱡᱟᱨ ᱠᱷᱮᱨᱣᱟᱲ ᱠᱩᱲᱤ
      ᱵᱟᱝ ᱠᱚ ᱨᱚᱲᱟ ᱡᱟᱱᱟᱢ ᱟᱲᱟᱝ,
   ᱚᱱᱟᱛᱮ ᱯᱟᱞᱮ ᱥᱮᱛᱟᱜ ᱵᱮᱲᱟ ᱪᱷᱟᱴᱠᱟ ᱡᱚᱡᱚᱜ
    ᱵᱟᱝ ᱡᱩᱴᱟᱹᱣ ᱟᱠᱚ ᱡᱚᱱᱚᱜ ᱠᱷᱟᱲᱟᱝ ᱾

᱔᱘. ᱦᱟᱴ ᱵᱟᱴ ᱨᱮ ᱠᱷᱮᱡᱟ ᱚᱲᱟᱜ ᱫᱚ
      ᱠᱚᱢ ᱥᱚᱢ ᱛᱮ ᱢᱩᱞᱟᱹᱣᱚᱵᱼᱟ,
      ᱚᱱᱮ ᱡᱮᱢᱚᱱ ᱦᱟᱴᱯᱟᱛᱟ ᱨᱮ ᱪᱷᱟᱹᱰᱩᱭ ᱠᱩᱲᱤ
      ᱯᱟᱱ ᱠᱚᱛᱮ ᱠᱚ ᱵᱷᱩᱞᱟᱹᱣᱚᱵ ᱾

᱔᱙. ᱥᱤᱵᱤᱞ ᱨᱚᱲ ᱞᱟᱸᱱᱫᱽ ᱵᱟᱝᱠᱷᱟᱱ
       ᱰᱟᱸᱝᱜᱣᱩᱣᱟᱹ ᱢᱚᱱᱮ ᱫᱚ ᱵᱟᱝᱜᱮ ᱜᱚᱴᱟᱜᱼᱟ,
      ᱚᱱᱠᱟ ᱜᱮ ᱫᱩᱞᱟᱹᱲ ᱵᱟᱝ ᱠᱷᱟᱱ
      ᱫᱩᱞᱟᱹᱲᱤᱭᱟᱹ ᱜᱮ ᱵᱟᱝᱜᱮ ᱡᱚᱴᱟᱣᱚᱜᱼᱟ ᱾

᱕᱐. ᱚᱞᱚᱜ ᱯᱟᱲᱦᱟᱣᱜ ᱞᱟᱹᱜᱤᱫ ᱚᱞᱚᱜ ᱠᱚᱲᱟ
      ᱥᱚᱢᱚᱭ ᱜᱮᱛᱟᱢ ᱵᱟᱹᱱᱩᱜ,
      ᱚᱱᱟ ᱛᱮᱜᱮ ᱦᱟᱴ ᱯᱟᱛᱟ ᱨᱮ
      ᱪᱷᱟᱹᱰᱩᱭ ᱠᱩᱲᱤ ᱴᱷᱮᱱ ᱜᱮᱢ ᱦᱟᱹᱱᱩᱜ ᱾

᱕᱑. ᱟᱢ ᱠᱷᱟᱹᱛᱤᱨ ᱛᱤᱱᱟᱹᱜ ᱠᱚ ᱨᱚᱲᱤᱧ ᱠᱟᱱᱟ
      ᱥᱮᱛᱟᱜ ᱛᱤᱠᱤᱱ ᱛᱟᱨᱟᱥᱤᱧ,
      ᱚᱱᱟ ᱵᱷᱟᱵᱽᱱᱟ ᱛᱮ ᱦᱚᱨᱚᱜ ᱟᱠᱟᱹᱧ ᱵᱤᱪᱷᱱᱟ
      ᱦᱩᱭᱩᱜ ᱠᱟᱱᱟ ᱵᱟᱨᱥᱤᱧ ᱾

᱕᱒. ᱟᱢ ᱞᱟᱹᱜᱤᱫ ᱛᱮ ᱪᱤᱴᱷᱤᱧ ᱚᱞᱟ
      ᱧᱤᱫᱟᱹ ᱥᱟᱲ‌ᱟ ᱥᱟᱹᱛᱤᱧ,
      ᱤᱠᱷᱟᱹᱱ ᱜᱚᱨᱚᱡᱽ ᱢᱚᱱᱮ ᱛᱤᱧ ᱪᱟᱞᱟᱢ
     ᱨᱮᱦᱚᱸ ᱪᱟᱜ ᱵᱟᱢ ᱥᱟᱵᱽ ᱛᱤᱧ ᱾

᱕᱓. ᱡᱟᱦᱟᱸ ᱨᱮᱜᱮᱧ ᱧᱟᱢ ᱢᱮᱭᱟ
      ᱠᱟᱛᱷᱟᱜ ᱜᱮ ᱥᱟᱹᱱᱟᱹᱧ ᱧᱟ,
      ᱠᱚᱭᱚᱜ ᱧᱟᱯᱟᱢ ᱢᱚᱱ ᱫᱚ ᱫᱷᱩᱠᱩ ᱯᱩᱠᱩ
      ᱯᱟᱞᱮᱢ ᱢᱟᱱᱟᱧᱟ ᱾

᱕᱔. ᱠᱤᱥᱟᱹᱬ ᱦᱚᱯᱚᱱ ᱮᱨᱟ ᱟᱢᱫᱚ
      ᱪᱟᱜ ᱮᱢ ᱜᱚᱨᱚᱡᱟᱧᱟ,
      ᱚᱱᱟᱛᱮᱜᱮ ᱯᱟᱞᱮ ᱧᱟᱯᱟᱢ ᱯᱤᱪᱷᱤ
      ᱦᱚᱨᱮᱢ ᱥᱟᱦᱟ ᱦᱟᱹᱧᱟ ᱾

᱕᱕. ᱛᱟᱨᱟ ᱠᱮᱪᱟᱜ ᱜᱤᱨᱟᱹ ᱥᱟᱠᱟᱢ
      ᱮᱢᱟᱢ ᱠᱟᱱᱟᱭ ᱟᱹᱢᱤᱡ ᱜᱟᱹᱛᱤᱧ,
      ᱟᱞᱚᱢ ᱦᱤᱲᱤᱧᱟ ᱡᱤᱣᱤ ᱜᱟᱛᱮ ᱥᱟᱞᱟᱜ
      ᱧᱟᱯᱟᱢ ᱧᱤᱫᱟᱹ ᱥᱟᱲᱟ ᱥᱟᱹᱛᱤᱧ ᱾

᱕᱖. ᱧᱟᱯᱟᱢ ᱦᱚᱞᱟᱝ ᱧᱟᱯᱟᱢ ᱮᱱᱟ
      ᱟᱥᱟ ᱢᱚᱱᱮ ᱦᱚᱸ ᱜᱚᱴᱟ ᱮᱱᱟ,
      ᱫᱩᱞᱟᱹᱲ ᱫᱩᱣᱟᱹᱨᱮᱢ ᱛᱟᱦᱮᱸ ᱠᱟᱱᱟ
      ᱮᱱᱦᱚᱸ ᱪᱤᱠᱟᱹᱢ ᱮᱴᱟᱜ ᱮᱱᱟ ᱾

᱕᱗. ᱫᱤᱱ ᱜᱮᱢ ᱥᱩᱛᱩᱜ ᱩᱰᱩᱠ ᱠᱤᱫᱤᱧ
      ᱟᱹᱧᱪᱤᱨ ᱯᱟᱹᱧᱪᱤᱨ,
      ᱵᱟᱹᱠᱷᱩᱞ ᱠᱷᱚᱱᱟᱜ ᱪᱟᱪᱚ
      ᱜᱤᱫᱽᱨᱟᱹ ᱞᱮᱠᱟ ᱾

᱕᱘. ᱪᱷᱟᱹᱰᱩᱭ ᱠᱩᱲᱤ ᱢᱚᱱᱮ ᱫᱚ
       ᱪᱷᱟᱛᱟ ᱪᱷᱩᱰᱟᱹᱨ ᱥᱩᱥᱩᱨᱵᱟᱝ,
       ᱟᱞᱚ ᱠᱚᱲᱟᱢ ᱯᱟᱸᱡᱟ ᱡᱚᱝ
       ᱩᱡᱟᱹᱲ ᱛᱟᱢᱟᱭ ᱵᱮᱨᱮᱞ ᱡᱟᱝ ᱾

᱕᱙. ᱥᱟᱹᱨᱤ ᱱᱟᱥᱮᱢ ᱠᱩᱲᱤ ᱟᱠᱟᱱ
      ᱦᱟᱴ ᱯᱟᱛᱟ ᱨᱮ ᱠᱚᱲᱟ ᱴᱷᱮᱱ ᱜᱮᱢ
      ᱫᱷᱩᱱᱟᱹᱣᱵ ᱠᱟᱱ,
      ᱠᱩᱞᱤ ᱞᱮᱢ ᱠᱷᱟᱱ ᱞᱟᱹᱭ ᱫᱚ ᱦᱚᱴᱚᱨ
      ᱯᱷᱩᱞᱟᱹᱣ ᱨᱚᱴᱮ ᱞᱮᱠᱟ ᱡᱚᱦᱟᱢ
      ᱯᱷᱩᱞᱟᱹᱣ ᱮᱫ ᱠᱟᱱ ᱾

᱖᱐. ᱟᱢᱫᱚᱢ ᱪᱟᱞᱟᱣ ᱮᱱᱟ ᱛᱟᱦᱮᱸ ᱮᱱᱟ
      ᱟᱥᱟ ᱵᱟᱹᱞᱤ ᱨᱮᱛᱟᱢ ᱯᱟᱸᱡᱟ,
      ᱟᱢᱟᱜ ᱵᱩᱜᱤ ᱞᱟᱹᱜᱤᱫ ᱥᱤᱸᱜᱟᱹᱲ ᱵᱮᱲᱟ
      ᱫᱤᱱᱤᱧ ᱞᱟᱜᱟᱣ ᱮᱱᱟ ᱥᱚᱸᱡᱟ ᱾

᱖᱑. ᱢᱩᱨᱩᱫ ᱵᱟᱦᱟ ᱧᱮᱞ ᱡᱚᱝ ᱜᱮ ᱪᱚᱢᱚᱠᱟ
     ᱤᱠᱷᱟᱹᱱ ᱥᱚᱫᱷᱟᱬ ᱥᱚ ᱫᱚ ᱵᱟᱹᱱᱩᱜ-ᱟ,
      ᱪᱷᱟᱹᱰᱩᱭ ᱠᱩᱲᱤ ᱥᱟᱞᱟᱜ ᱨᱚᱲ ᱞᱟᱸᱱᱫᱽ ᱜᱮ
      ᱵᱷᱟᱹᱜᱤᱜ-ᱟ ᱤᱠᱷᱟᱹᱱ ᱢᱟᱹᱱ ᱫᱚ ᱵᱟᱹᱱᱩᱜᱜ-ᱟ ᱾

᱖᱒. ᱰᱟᱸᱝᱜᱣᱩᱣᱟᱹ ᱠᱩᱲᱤ ᱟᱭᱚ ᱵᱟᱵᱟ ᱛᱟᱞᱟᱨᱮ
      ᱪᱟᱜ ᱯᱮ ᱜᱤᱛᱤᱡᱚᱜ-ᱟ,
      ᱚᱱᱟᱛᱮᱜᱮ ᱯᱟᱞᱮ ᱟᱯᱮᱫᱚ
      ᱩᱛᱤ ᱥᱩᱛᱤ ᱯᱮ ᱡᱟᱹᱯᱤᱫᱟ ᱾

(ᱱᱚᱣᱟ ᱫᱚ ᱡᱚᱠᱷᱮᱡ ᱢᱤᱫ ᱠᱟᱱᱟ, ᱛᱟᱸᱜᱤ ᱨᱮ ᱛᱟᱦᱮᱱ ᱛᱟᱵᱚᱱ ᱢᱟᱹᱹᱹᱱᱚᱣᱟ ᱰᱟᱸᱜᱩᱣᱟ ᱢᱚᱱᱮ ᱨᱮᱭᱟᱜ ᱥᱟᱱᱟᱢ ᱥᱟᱭᱟᱨᱤ ᱟᱯᱮ ᱥᱟᱱᱟᱢ ᱠᱚ ᱛᱟᱞᱟᱨᱮ ᱩᱥᱟᱹᱨᱟ ᱵᱚᱱ ᱥᱚᱫᱚᱨᱮᱫᱼᱟ)

ᱛᱩᱢᱟᱹᱞᱼ

ᱰᱟᱸᱜᱩᱣᱟᱹ ᱢᱚᱱᱮ, ᱢᱤᱫ ᱥᱟᱱᱛᱟᱲᱤ ᱥᱟᱭᱟᱨᱤ ᱯᱚᱛᱚᱵᱹᱹᱹ